ಕವಿತೆಗೊಂದು ಚಿತ್ರ ಬೇಕೆ ?

ಕವಿಯೆ ನಿನ್ನ ಕವಿತೆಗೊಂದು 

ರಂಗು ರಂಗಿನ  ಚಿತ್ರವೇಕೆ

ಬರಹಕ್ಕೊಂದು ಹೂವ ಬಳ್ಳಿ 

ಅದರ ಮೇಲೆ ಚಿಟ್ಟೆ ಬೇಕೆ ?

ಮರಳುಗಾಡಿನಲ್ಲಿ ನೀನು 

ತೊಟ್ಟು ಹನಿಗೆ ಅಲೆದರೂನು

ನಿನ್ನ ಲೇಖನಿ ಯಲ್ಲಿ ನೀನು 

ಸಮುದ್ರವನ್ನೇ ಮಥಿಸಬಾರದೇಕೆ ?

ನಿನ್ನ ಕಣ್ಣಿನಲ್ಲಿ ಪೊರೆಯು ಬಂದು 

ಮಂಜು ಕವಳ ಕವಿದರೇನು

ಕವಿತೆಯಲ್ಲಿ ಸಗ್ಗ  ಇಳಿಸಿ ನೀನು 

ಇಳೆಯ ಜನರ ರಮಿಸಬಾರದೇಕೆ ?

ರಾಜ್ಯವೆಲ್ಲಾ ಕೊಳ್ಳೆಹೋಗಿ

 ಲೋಕವೆಲ್ಲಾ ಕತ್ತಲಾಗಿ 

ಬೆಳಕು ಬಂಧಿಯಾದರೂನು

ಎದೆಯ ಗುಡಿಗೆ ಕಿಚ್ಚು ಹಚ್ಚಿ 

ಆತ್ಮವನ್ನೆ ಸುಟ್ಟು ನೀನು 

ಜಗದ ಇರುಳ ಕಳೆಯ ಬಾರದೇಕೆ ?

ಮನುಜರೆದೆಗೆ ಬರವು ಬಡಿದು 

ಅಂತಃಕರಣ ಸೆಲೆಯು ಬತ್ತಿ 

ಧರೆಯೇ ಹೊತ್ತಿ ಉರಿದರೂನು

ಉರಿವ ಹೃದಯ ಜ್ವಾಲೆಗಳಿಗೆ

ನಿಟ್ಟುಸಿರಿನ ಗಾಳಿ ಬೀಸಿ

ಆಶ್ರು ಜಲದ ಮಳೆಯ ಸುರಿಸಿ

ಮಳೆ ಬಿಲ್ಲನು ರಚಿಸಬಾರದೇಕೆ ?

ಬೇಲಿಯೆಲ್ಲಾ ಶೂಲವಾಗಿ 

ದೇಶವೆಲ್ಲಾ ಜೈಲೆ ಆಗಿ

ನೀನೆ ನಿನ್ನ ಮನೆಯ ಒಳಗೆ  

ಬಂಧಿಯಾಗಿ ಹೋದರೇನು

ಕವಿತೆಯೆಂಬ ಹಕ್ಕಿಗೊಂದು 

ಒಲವ ರೆಕ್ಕೆ ಪುಕ್ಕ ಬಿಡಿಸಿ

ಸ್ವತಂತ್ರ ಕನಸಿನಾಗಸಕ್ಕೆ 

ಒಮ್ಮೆ ಹಾರಿ ಬಿಡ ಬಾರದೇಕೆ ?

-- ಪುನೀತ್ ಅಪ್ಪು